Al vier Helpmekaar spanne deur na semi-finale!

Helpmekaar het Saterdag een van hulle beste rugbydae in hulle 89-jaar geskiedenis beleef,toe al vier spanne hulle kwarteindstryd wedstryde in die Beeldtrofee vir Grootskole gewen het.

Die 0/14-span het die moeilike span van Transvalia met 17-12 geklop, in ‘n klipharde wedstryd.

Die 0/15-span het hulle puik seisoen voortgesit en die span van Hugenote met 26-12 geklop. Helpmekaar se kaptein en agtsteman, Johan van Rensburg, het ‘n puik wedstryd gehad, en 16 van sy span se punte aangeteken. Hy het geslaag met twee reuse strafskoppe van by die 50 meter.

Die 0/16-wedstryd was ‘n taai en senutergende stryd tussen twee spanne wat nie wou bes gee nie. Helpmekaar moes die laaste paar minute desperaat op hulle doellyn verdedig, voor hulle dit kon deurtrek met 10-6 teen die span van HTS Vereeniging.

Helpmekaar se eerstespan het hulle puik vertonings van die laaste ruk voortgesit en die span van Klerksdorp met 36-3 afgeransel.

Helpmekaar se Goue Leeus Akademie heelagter, Quinton Norris, het ‘n puik wedstryd beleef en somtyds die verdediging van Klerkdorp oorhoops gehad. Sy teenvalle van agter was iets om te aanskou en het hy drie drieë gedruk. Quinton het reeds vanjaar 17 drieë gedruk, wat hom een van die top driedrukkers in Suid-Afrikaanse skole rugby maak.

Helpmekaar se pak voorspelers het die basis gelê vir hulle blitsige agterlyn om 6 drieë te druk. Slot, Alex du Plooy, het ook ‘n puik wedstryd beleef en het orals op die veld opgeduik. Helpmekaar speel eerskomende Saterdag teen Hoërskool Standerton in die semi-finale op Helpmekaar se velde.

Helpmekaar wen VIER bekers!

Helpmekaar het Saterdag ‘n puik prestasie behaal toe al vier spanne hulle wedstryde in die finale van Goue Leeus Beeldtrofee- kompetisie vir Grootskole gewen het. Dit is die eerste keer sedert privatisasie in 1994 dat Helpmekaar al vier trofeë gelyktydig kon wen.

In die eerste wedstryd het die o/16-span die moedige span van Roodepoort met 29 – 14 geklop. Die span moes baie hard werk nadat Roodepoort aanvanklik die voortou geneem het. Twee vinnige drieë net voor halftyd het egter die wedstryd beklink vir Helpmekaar.

Die o/15-span het Jan Viljoen redelik maklik met 31 - 19 geklop in ‘n eensydig wedstryd. Twee laat drieë deur Jan Viljoen het die telling beter laat lyk. Die o/15-span is die verdedigende Beeldtrofee kampioene
.
Die o/14- span het ook redelike maklik gewen met 31 – 0 teen die span van Riebeeckrand, ten spyte van verskeie vreemde beslissings teen hulle. Die o/14-span het vanjaar slegs 3 punte afgestaan in die liga, insluitend die semi-finale en finale.

Die eerste span het die beste prestasie van die dag gelewer deur Riebeeckrand met 64 – 0 te verwoes. Die span was vlymskerp en het 9 drieë ingeryg in ‘n puik vertoning van hardloop-rugby. Bassie van Heerden het 3 drieë gedruk en Quinton Norris twee. Riebeeckrand het geen antwoord gehad vir Helpmekaar se totale-rugby nie. Die wedstryd sal sekerlik onthou word as een van die beste vertonings ooit van enige span in ‘n eindstryd in Gauteng.

Helpmekaar se vier spanne dring direk deur na die Kwarteindrondte van die Beeldtrofee op 7 Augustus. Die wedstryde sal plaasvind by Helpmekaar se velde.

Rugby Nuus 23 April 2010

Na die langnaweek begin die liga en is ons eerste wedstryd Saterdag 1 Mei teen HS Riebeeckrand by ons. Aangesien verskeie van die skole in die liga nie altyd B-spanne het nie, het ons addisionele wedstryde vir die spanne gereël.
Die volgende spanne speel Donderdag 29 April teen HS Vorentoe by hulle



Busse sal die seuns daar gaan aflaai, maar ouers moet asseblief die spelers weer self gaan haal. Vorentoe is die skool wat reg langs UJ geleë is.

Die bepalings vir Saterdag 1 Mei is as volg:



Ons wil net graag die datum van die Konka kamp bevestig. Die kamp vind plaas van 6 Julie tot 9 Julie, en is verpligtend vir alle A-span groepe en die eerste span groep. Die inligting en koste van die kamp sal aan die einde van Mei aan u deurgegee word.
Ons hoop dat u almal ‘ n lekker langnaweek het en sien u volgende Saterdag by die Beeld-trofee wedstryde.

Rugby program Termyn 2

1 Mei

Beeldtrofee vs Riebeeckrand Tuis
5 Mei

Beeldtrofee vs Alberton Weg
8 Mei

Beeldtrofee vs Dinamika Tuis
10 Mei

Goue Leeus proewe rondte 2 Spelers in Sentraal spanne
15 Mei

Beeldtrofee vs Roodepoort Weg
17 Mei

Goue Leeus finale proewe Spelers in finale spanne
22 Mei

Beeldtrofee vs Jan Vijoen Weg
29 Mei

Beeldtrofee vs Bastion Tuis
5 Junie

Goue Leeus Halfeindrondte Spanne wat kwalifiseer
10 Jun – 11 Julie Vakansie/Wêreldbeker

6 Jun – 9 Jul Konka kamp Rustenburg Spanne in Finale

Rugby Proewe

Die proewe van die Sentraal streek vir o/15 en o/16 is reeds afgehandel, terwyl die o/18 spanne binne die volgende week gefinaliseer sal word. Die o/15 spelers sal sleg deel vorm van ‘n Talentvolle Spelers-groep, terwyl die o/16 en o/18 spelers aan nasionale weke gaan deelneem. Vir beide ouderdoms-spanne word ‘n “Cravenweek” span gekies, asook ‘n Akademie-span. Die volgende rondte proewe vind plaas op 10 Mei by die volgende plekke:

o/18 by Alberton rugbyklub
o/16 by Alberton High School
o/15 by Hoërskool Dinamika.

Die verskillende streke speel teenmekaar, waaruit 6 spanne per ouderdomsgroep gekies sal word, om aan die finale proewe op 17 Mei deel te neem. Sterkte aan die seuns wat verder deelneem aan die proewe.

Paasnaweek Rugby Nuus

Helpmekaar se rugbyspanne het die afgelope Paasnaweek by verskillende rugbyfeeste in die land gespeel en baie sukses behaal.

Die eerstespan het deelgeneem aan St John’s se Easter Rugby Festival. Hulle eerste wedstryd was teen die baie sterk span van Paarl Boys. Nadat hulle 23 – 3 agter was, het Helpmekaar terug geveg en 3 uitstekende drieë gedruk. Paarl Boys moes hard baklei om uiteindelik met 26 – 18 te wen. In hulle tweede wedstryd het Helpmekaar afgereken met die FNB- uitnodigingspan, 22 – 18. Die moeilike FNB span het op die Maandag gewys hulle is ‘n goeie span deur die gaste, St John’s te klop. Die laaste wedstryd op die Maandag was ‘n klipharde stryd teen die sterk span van HS Nelspruit. Die wedstryd het uiteindelik gelykop geeïndig met 7 punte elk. Gegewe dat Helpmekaar die skool by die toernooi was met die minste seuns, het die span baie goed gevaar teen taai kompetisie.

Die o/14-, 0/15- en 0/16- spanne het deelgeneem aan die Skonk Nicholson rugby fees by Maritzburg College in Pietermaritzburg, die grootste fees in die land met 54 spanne wat aan die week deelneem.

Die spanne het as volg gevaar:
0/16 Span: Wen teen Kearsney 13 – 0, verloor teen Westville 22 – 10 en wen teen Hilton College 20 – 12.
0/15 Span: Wen teen DHS 42 – 12, wen teen HS Middelburg 29 – 0 en wen teen Glenwood 19 – 0.
0/14 Span: Wen teen Jeppe 13 – 8, verloor teen Grey Kollege 34 – 0 en wen teen KES 23 – 18.
Geluk aan al die seuns en hulle afrigters vir die spanne se goeie vertonings.